Орталық-Азиялық электр энергетикасы корпорациясы (ОАЭК) 2023 жылға өз акционерлеріне - бизнесмендер Александр Клебанов пен Сергей Канға дивиденд төлемейді. Сонымен қатар, компания бір жыл бұрынғыға қарағанда әлдеқайда табысты болды.
Forbes.kz мәліметі бойынша, бұл шешім акционерлердің жалпы жиналысында қабылданды, себептері аталмайды.
Белгілі болғандай, 2023 жылы ОАЭК «еншілес» компаниялармен бірге 4,7 млрд теңге пайда тапты. Бір жыл бұрын корпорацияның шығыны 29,7 млрд теңгені құраған.
2023 жылдың қорытындысы бойынша негізгі құралдарды қайта бағалау компанияға 32,4 млрд теңге көлемінде пайда әкелді. Осылайша, жиынтық пайда 37,1 млрд теңгені құрады.
2022 жылдың қорытындысы бойынша қайта бағалаудан кейін ОАЭК-тің жиынтық шығыны 37,3 млрд теңгеге дейін өскені хабарланады.
«2023 жылы бір акцияға шаққандағы пайда — 128,21 теңге (2022 жылы бір акцияға шаққандағы шығын — 568,38 теңге)», - делінген хабарламада.
2022 жылдың қорытындысы бойынша топтың да дивиденд төлеуден бас тартқаны атап өтіледі.
ОАЭК Forbes Kazakhstan нұсқасы бойынша 2023 жылға арналған ҚР-дағы 50 ірі жеке компаниялар рейтингінде 18-ші орында тұр. Топ электр және жылу энергиясын өндіру, беру, бөлу және өткізумен айналысады.
Корпорацияның негізгі акционерлері бизнесмендер Александр Клебанов пен Сергей Кан болып табылады, олардың әрқайсысы компанияның 47,1% акциясына ие.
Еске салайық, тамыз айында «Шұбаркөл Премиум» АҚ акционерлері бірауыздан шешім қабылдады, компания 2023 жылға дивиденд төлемейді. Бұл жыл қорытындысы бойынша АҚ 4,02 млрд теңге шығын алғанына байланысты болуы мүмкін. Компания ішінара бизнесмен Тимур Күлібаевтың бақылауында.