Кассирлер «Қазпошта» АҚ-ның Алматы облысы Жамбыл ауданынан азаматтардың әртүрлі мемлекеттік қызметтер үшін төлеген қаражатын ұрлады деп күдіктелуде.
Қаржылық мониторинг агенттігінің (ҚМА) баспасөз қызметінің мәліметінше, Қазпоштаның кассирлері 2021 жылдан 2023 жылға дейін жеке құжаттарды рәсімдеу бойынша қызмет көрсете отырып, төленген мемлекеттік баж салығының бір бөлігін иемденіп, ал көші-қон полициясына бұрмаланған сомалары бар жалған түбіртектер жіберген.
Мемлекетке келтірілген залал 84 млн теңгеден астам деп бағаланды.
Еске сала кетейік, бұған дейін «Қазпошта» АҚ-ның қауіпсіздік қызметі мен ревизия және бақылау басқармасы бірқатар өңірлерде жалпы сомасы 396,7 млн теңге қаржылық бұзушылықтарды анықтады.
Сонымен қатар, Түркістан облысында почтаның 39 жастағы қызметкері Болат Керімқұловқа үкім шығарылғаны хабарланды. Ол Қазығұрт ауданындағы «Қазпошта» АҚ филиалында 69,8 млн теңгені ұрлады деп айыпталды.
Сот Керімқұловты ерекше ірі көлемде ұрлауға кінәлі деп танып, оны 8 жыл бас бостандығынан айыруға соттады. Сонымен бірге сот аудандық пошта филиалының бұрынғы бухгалтерия қызметкерлеріне қатысты тергеуді тоқтатудың заңдылығын тексеру туралы қаулы шығарды.