2027 жылдан бастап Қазақстанда жедел медициналық көмек көрсетудің жаңа жүйесі күшіне енеді. Негізгі өзгерістер жедел жәрдем станциялары мен емханалар жанынан құрылатын бригадалар арасындағы міндеттерді қайта бөлуге қатысты болады. Шақырулар шұғылдық дәрежесі бойынша бөлінеді, ал медиктердің басымдығы өмірге қауіп төндіретін жағдайларға беріледі.
24.kz хабарлағандай, жаңа нормаларға сәйкес, өтініштерге жауап беру тәртібі тәулік уақытына байланысты болады. Күндізгі уақытта науқастарға жедел көмекті емханалар жанындағы бригадалар көрсетеді, түнде — жауапкершілік жедел жәрдем станцияларына ауысады. Бұл ретте 103 бірыңғай жедел көмек желісі тәулік бойы жұмысын жалғастырады.
«Бүгінгі таңда емханалар еңбек кодексіне сәйкес кешкі сағат 8-ге дейін жұмыс істейді және оларда түнгі ауысым жоқ. Сонымен қатар, емханалардағы бригадалардың саны шектеулі, бұл көмектің уақтылы көрсетілмеу қаупін тудырады. 35 мың адамға бір бригада қарастырылған, ал жедел жәрдем станциясында топтар бірін-бірі алмастыра алады», - деді медициналық көмекті ұйымдастыру департаменті басқармасының басшысы Әсел Қыдыралиева.
Сонымен қатар, 103 нөміріне келіп түсетін шақырулар шұғылдығына қарай төрт санатқа бөлінетін болады. Алғашқы көмек көрсетуге сұраныстар саны артып келе жатқаны атап өтіледі. Тек 2024 жылы ғана 8,5 млн шақыру тіркелген және науқастардың едәуір бөлігі бригадалардың келу уақытына наразы болған.
Өз кезегінде ҚР Денсаулық сақтау министрі Ақмарал Әлназарова келесі жылы жергілікті атқарушы органдарға жедел бригадалардың жұмысын қаржыландыру және реттеу жөніндегі өкілеттіктерді беру жоспарланғанын нақтылады. Сөз, атап айтқанда, көлікпен қамтамасыз ету, гараждар салу және кезекші топтар санын көбейту мәселелері туралы болып отыр.
Сондай-ақ, жаңа енгізулер аясында алғашқы көмек шақыру үшін негіздемелер тізбесін бекіту жоспарлануда. Төтенше жағдайларда 103 нөміріне қоңырау шала алмаған кезде балама байланыс арналарын енгізу көзделуде.