Қарағанды маңында орналасқан Курьяновка кентінің тұрғындары медициналық қалдықтарды кәдеге жарату зауытының ашылуына қарсы шықты. Олар көп жылдар бойы экологиялық мәселелермен күресіп келе жатқанын және зауыт тағы бір мәселе қосады деп қауіптенетіндерін айтты.
Informburo.kz мәліметінше, ауыл тұрғындары медициналық қалдықтарды жағу кәсіпорнының пайда болуы туралы 17 желтоқсанға белгіленген қоғамдық тыңдаулар туралы хабарландырудан білген.
«Соңғы төрт жылда Курьяновка тұрғындары үшін – тірі қалу үшін тынымсыз күрес. Олар тіпті өз кенттерін крематориймен салыстырады. Бір жылдан астам уақыт бойы оны ЖЭО-ның ескі күл үйіндісінің шаңы басып, содан кейін олар қасына жаңасын салуға қарсы күресті. Дәл қазір көмір тұйықтары шаңдатады, ал өзенге мезгіл-мезгіл кәріз ағындылары төгіледі», - делінген хабарламада.
Өз кезегінде мердігер – Астанадағы «Алтын-Жага» ЖШС-нің директоры екі деңгейлі жағу және сүзгісі бар жоғары температуралы пеш 96% ластануды тазарта алатынына сендірді. Ол электр қуатының жоқтығынан зауытты тұрғын үй секторынан алыс орната алмайтынын атап өтті.
«Бұл жоба әлі жүзеге асырылған жоқ. Уәкілетті органнан да, бізден де ешқандай рұқсат жоқ. Бүгінгі таңда олар тек медициналық қалдықтарды кәдеге жарату үшін пеш орнатуды жоспарлап отыр. Егер шығарындылар болмаса, егер қауіп болмаса, неге алаңдау керек?» – деп өз тарапынан Қарағанды облысы табиғи ресурстар және табиғат пайдалануды реттеу басқармасының басшысы Бахтияр Санбаев түсіндірді.
Айта кетейік, Курьяновка тұрғындары зауыт құрылысына қарсы мыңнан астам қол жинады.
Еске сала кетейік, қазан айында Алматы облысында алты ауылдың тұрғындары биліктен өткен ғасырда жабылған Шынасыл-Сай шахтасын қайта ашуға тырысып жатқан Block One Company компаниясын тоқтатуды сұраған болатын. Ауыл тұрғындары алтын өндірушілердің жұмысы 50 мың тұрғынын сумен қамтамасыз ететін өзеннің ластануына әкеп соғуы мүмкін деп есептейді.