Қазыбек би аудандық соты Қарағандыда Мемлекеттік кірістер департаментіндегі (МКД) сыбайлас жемқорлық ісі бойынша үкім шығарды.
Қарағанды соттарының баспасөз қызметінің мәліметінше, істің негізгі фигуранты Қарағанды облысы бойынша МКД кедендік әкімшілендіру басқармасының басшысы болды. 2024 жылдың ақпан-мамыр айлары аралығында ол жалпы сомасы 334 000 теңге көлемінде пара алған.
Тергеу мәліметінше, пара декларацияны толтыру кезіндегі бұзушылықтарға байланысты әкімшілік жауапкершілікке тартпау үшін берілген.
Делдалдар ретінде МКД тарифтік реттеу басқармасының басшысы және ЖШС-нің бірінің көлік логистикасы бойынша менеджері әрекет еткен. Параны жеке компаниялардың төрт басшысы берген.
Нәтижесінде сот істің негізгі фигурантына 21,7 млн теңге мөлшерінде айыппүл салды, ал МКД тарифтік реттеу басқармасының басшысына – 2,5 млн теңге. Көлік логистикасы бойынша менеджер 540 мың теңге төлеуге міндеттелді.
Пара берушілерге 810 мың теңгеден 3 млн теңгеге дейін айыппүл тағайындалды. Барлық сотталғандарға мемлекеттік қызметте және квазимемлекеттік секторда лауазымдарды атқаруға өмір бойына тыйым салынды.
Еске сала кетейік, 2023 жылдың қыркүйегінде бірінші сатыдағы сот Алматы бойынша МКД кеден қызметінің қызметкерлері Асанбай М., Бекжүнісова Д. және Анарбеков М.-ны сыбайлас жемқорлықта кінәлі деп таныған. Лауазымды тұлғалар кедендік бақылаудан кедергісіз өту үшін кәсіпкерлерден бірнеше рет пара алған.
2024 жылдың желтоқсанында БҚО бойынша МКД жетекші маманы 10 жыл бас бостандығынан айыруға сотталды. Оның кәсіпкерден аса ірі мөлшерде ақша қаражатын алғаны хабарланған. Пара «Сырым» өткізу пункті арқылы ауыр жүк көліктерінің жеделдетілген және кедергісіз өтуіне жәрдемдесу үшін берілген.