Қарағанды облысы бойынша Қаржы мониторингі агенттігінің (ҚМА) Департаменті «Еңбек» РМК филиалының бұрынғы басшыларына қатысты тергеу жүргізуде. Олар бюджет қаражатын ұрлауға күдікті.
ҚМА баспасөз қызметінің мәліметінше, 2021 және 2023 жылдары кәсіпорын және оның филиалы киім-кешек пен аяқ киім өндіруге арналған былғары және тоқыма шикізатын жеткізуге «бір көзден тәсілмен» 23 шарт жасасқан. Алайда тауар жеткізілмеген, ал 449 млн теңге көлеміндегі бюджет қаражаты ұрланған.
«Жымқырылған кірістерді заңдастыру мақсатында күдіктілер қолма-қол ақшаны алудың белгіленген шегінен айналып өтіп, кәсіби ақша жуушының қызметтерін пайдаланған», - делінген хабарламада.
Тартылған маман сомаларды бөліп, бақылаудағы төрт ЖК атынан киім-кешек пен аяқ киім тігуге арналған тауарларды жеткізуге жалған шарттар жасасқан. Осы шарттар мен шоттар негізінде қылмыскерлер 122 млн теңгені қолма-қол ақшаға айналдырған.Жымқырылған кірістердің бір бөлігін олар Алматыдағы жеке үй мен BMW X6 көлігін сатып алуға жұмсаған. Мүлікті ықтимал тәркілеуден жасыру үшін оны сенімді адамдарға ресімдеген. Күдіктілер 2 айға қамауға алынды. Сот санкциясымен жылжымайтын мүлік пен көлікке тыйым салынды.
Еске сала кетейік, өткен жылдың сәуір айында хабарланғандай, «Солтүстік Қазақстан облысы әкімдігінің Құрылыс, сәулет және қала құрылысы басқармасы» ММ «Еңбек-Өскемен» РМК №110 филиалымен бір көзден теннис орталығын салуға шарт жасасқан. Шарт сомасы шамамен 3,2 млрд теңгені құраған. ФБРК редакциясы келісімнің мәліметтерін зерделеп, оны жасасу кезінде бірқатар бұзушылықтарды анықтады.