Қостанай облысында түнгі клубтың жанында мас күйінде көлік жүргізген имам Бахытбек Тажимбет жұмыстан босатылды.
ORDA деректері бойынша, имам түнде Бурабай кентіндегі «Регион» клубының жанында ұсталды. Ол Highlander көлігін мас күйінде жүргізген.
Сотта Тажимбет кінәсін мойындамай, «тек қымыз ішкенін», алкогольдік сусындар ішпегенін айтты. Алайда сараптама нәтижелері оның мас күйінде болғанын көрсетті.
Сөйтіп, сот шешімімен Бахытбек Тажимбет 15 тәулікке қамауға алынады. Сонымен қатар ол 7 жылға жүргізуші куәлігінен айырылды.
Өз кезегінде Қазақстан Мұсылмандар діни басқармасы имамға қатысты жанжалға түсініктеме берді.
«Заң нормаларын және дін қызметкерінің этикасын өрескел бұзатын адамдардың басқару жүйесіндегі діни салада жұмыс істеуге моральдық құқығы жоқ. Бахытбек Тажимбетов лайықсыз мінез-құлқы үшін Қостанай облысының бас имамы қызметінен босатылды. Қазақстан мұсылмандары діни басқармасы болған оқиғаны үлкен өкінішпен қабылдап, елдегі мұсылман қауымынан кешірім сұрайды», — деді діни басқармада.