Банкрот болған Delta Bank бұрынғы иесі Нұрлан Тлеубаевқа тағы бір үкім шығарылды. Бұған дейін ол жымқыру үшін 10 жылға сотталған болатын. Енді Тлеубаевқа 6 жыл 8 ай бас бостандығынан айыру жазасы тағайындалды, алайда жаза мерзімі өзгеріссіз қалды.
Kursiv.media деректері бойынша, Астана қылмыстық істер жөніндегі сотында Тлеубаевтың белгілі бір акционерлік қоғамнан «Агробизнес-2020» бағдарламасы аясында бөлінген 4 млрд теңгеден астам қаражатты жымқырғаны айтылды.
Өз кезегінде журналистер акционерлік қоғам «ҚазАгро» ұлттық басқарушы холдингі болуы мүмкін деп болжайды.
Белгілі болғандай, жымқырылған ақшаны Тлеубаев жалған астық сатып алу-сату шарттары бойынша қарыз ретінде өзіне бағынышты «Алиби» холдингінің шоттарына аударған, онда оның үлесі 87% құраған.
«Кепіл мүлкі ретінде 76 мың тоннаға жалған астық қолхаттары, болашақта ЖШС-ке түсетін 4,8 млрд теңге сомасындағы ақша қаражаты, сондай-ақ ЖШС-ке тиесілі жалпы саны 16 541 га ауылшаруашылық жер учаскелері, оның ішінде 14 767 га ЖШС жер пайдаланушыларының (үлескерлерінің), яғни СҚО тұрғындарының білімі мен келісімінсіз кепілге қойылған. 2016 жылы қарыз бойынша төлемдер тоқтатылып, жер учаскелеріне қатысты барлық құқықтар (талаптар) толық көлемде «Н» АҚ-на берілді», — деп түсіндірді сотта.
Нәтижесінде Нұрлан Тлеубаев кінәлі деп танылып, 6 жыл 8 ай бас бостандығынан айыруға, коммерциялық және қаржы ұйымдарында 10 жыл басшылық қызметтерді атқаруға тыйым салынды. Сонымен қатар, оған кез келген қаржы ұйымдарының ірі акционері болуға тыйым салынды.
«ҚР ҚК-нің 56-бабы 6-бөлігі (Аяқталмаған қылмыс үшін жаза тағайындау – ред. ескертпесі) негізінде қылмыстық құқық бұзушылықтардың жиынтығы бойынша осы үкіммен тағайындалған неғұрлым жеңіл жазаны Алматы қаласы Алмалы аудандық сотының 26.06.2023 жылғы үкімімен тағайындалған неғұрлым ауыр жазаға сіңіру жолымен сотталушыға түпкілікті 10 жыл мерзімге бас бостандығынан айыру жазасы тағайындалды. Үкім заңды күшіне енген жоқ», — деп қорытындылады сот.
Еске салайық, бұған дейін Delta Bank-тан жымқыру үшін Тлеубаев 10 жыл бас бостандығынан айыруға сотталған. Тергеу аясында құқық қорғау органдары банктің бұрынғы иесі мен оның туыстарының мүлкін, оның ішінде элиталық мейрамхананы, төрт бөлмелі пәтерді, Чех Республикасы, Прага қаласындағы үш компаниядағы 100% үлесті, сондай-ақ БАӘ-дегі Palm Jumeirah аралындағы шамамен $5 млн тұратын вилланы тәркіледі.
Осыдан басқа, Латвиядағы «Вентспилс астық терминалының» 100% үлесі Латвия Республикасымен бірлесіп халықаралық тергеу тапсырмасы арқылы тәркіленді. Сонымен қатар, Проблемалық несиелер қорына 5 қант зауыты және тағы 58 мүлік объектісі берілді.