Алматыда жеке сот орындаушысы (ЖСО) сотталды. Ол өндірілген қаражатты заңсыз иемдену және аса ірі көлемдегі алаяқтық үшін кінәлі деп танылды.
Қала прокуратурасының баспасөз қызметінің мәліметінше, айыпталушы қызметтік жағдайын пайдаланып, өндіріп алушыларға арналған ақшаны қайта бағыттаған. Кейіннен қаражат жеке шоттарға аударылған.
Барлығы сот орындаушысы 370 млн теңгеден астам қаражатты, сондай-ақ атқарушылық іс жүргізуде болған Range Rover автокөлігін иемденген.
Нәтижесінде ер адамға мүлкін тәркілеумен 8 жыл бас бостандығынан айыру жазасы тағайындалды. Сот оны сот орындаушысы қызметімен айналысу құқығынан да айырды. Үкім заңды күшіне енген жоқ.
Еске салайық, бұған дейін Талдықорған прокуратурасы ЖСО-ның нақты табыстары мен олардың 2023 жылға арналған салық декларацияларында көрсетілген деректер арасында үлкен сәйкессіздіктерді анықтады.
Өткен жылы аяқталған атқарушылық іс жүргізу көлемі 896,1 млн теңгені құрағаны, ал декларацияларда тек 231 млн көрсетілгені атап өтілді. Айырмашылық 665,1 млн теңгеге жетті.