Өскемен қаласының соты «Азия-Бипэк АВТО» директорлар кеңесінің төрағасы Анатолий Балушкинге және «Азия АВТО» АҚ бас директоры Ерік Сағымбаевке үкім шығарды.
Informburo.kz мәліметінше, үкім сырттай шығарылған, себебі сот залында айыпталушылар болмаған. Екеуі де Ресей азаматтары.
Анатолий Балушкин ҚК-нің 190-бабы, 4-бөлігі, 2-тармағы («Аса ірі мөлшерде жасалған алаяқтық») бойынша кінәлі деп танылып, 9 жыл бас бостандығынан айыру және коммерциялық ұйымдарда басшылық қызметтерді атқару құқығынан 10 жылға айыру жазасы тағайындалды.
Ерік Сағымбаев ҚК-нің 190-бабы, 4-бөлігі, 2-тармағы («Аса ірі мөлшерде жасалған алаяқтық») және ҚК-нің 245-бабы, 3-бөлігі («Қылмыстық топ немесе аса ірі мөлшерде жасалған салық төлеуден жалтару») бойынша кінәлі деп танылды. Оған 8 жыл 6 ай бас бостандығынан айыру және коммерциялық ұйымдарда басшылық қызметтерді атқару құқығынан 10 жылға айыру жазасы тағайындалды.
Бұрынғы басшылар жазасын орташа қауіпсіздіктегі қылмыстық-атқару жүйесі мекемелерінде өтеуі тиіс.
Сот жәбірленушінің өкілінің (ҚР индустрия және құрылыс министрлігі) материалдық залалды өтеу туралы азаматтық талабын қанағаттандырудан бас тартты.
Естеріңізге сала кетейік, 2023 жылдың мамырында ҚМА «Азия-Бипэк АВТО» директорлар кеңесінің төрағасы Анатолий Балушкинге, «Азия АВТО» АҚ бас директоры Ерік Сағымбаевке және компаниялар тобының бірқатар топ-менеджерлеріне қатысты сотқа дейінгі тергеуді бастады. Ол кезде оларды 230 млрд теңгеден астам қаражатты жымқыруда айыптады.
2024 жылғы тамызда Өскеменде Анатолий Балушкинге қатысты сырттай сот процесі басталды. 2020 жылы билік компаниямен келісімшартты бұзып, үкімет бөлген 174 млрд теңге көлеміндегі қаражатты қайтаруды талап еткені хабарланды. Тергеу нұсқасы бойынша, компания өкілдері автомобильдерді өнеркәсіптік құрастыру бойынша міндеттемелерін орындамаған. Осы сомаға компания 10 жыл ішінде жеңілдіктер алған.
Биылғы жылдың наурызында Өскеменде «Азия АВТО» компаниясының топ-менеджерлеріне үкім шығарылды. Айыпталушылар лавасына сегіз адам отырды. Олар алаяқтық, ақшаны жылыстату және салық төлеуден жалтару бойынша айыпталды. Іс бойынша Jusan Bank және индустрия және инфрақұрылымдық даму министрлігі жәбірленушілер деп танылды, бірақ айыптау мемлекетке келтірілген залалды дәлелдей алмады.
Нәтижесінде сот екі топ-менеджерді ақтады, ал қалғандарына 2,5 жылдан 2 жыл 8 айға дейін бас бостандығынан айыру жазасы тағайындалды. Алайда сот қамауда және үй қамағында өткізген уақытты ескеріп, жазаны өтелді деп есептеді.