Қазақстанға Ақтау қаласының бұрынғы әкім орынбасары Тимур Садвақасов жеткізілді, ол бұрын Өзбекстанда ұсталған болатын.
Қаржылық мониторинг агенттігінің (ҚМА) деректері бойынша, ол алаяқтық және лауазымды тұлғаларға ерекше ірі мөлшерде пара беруге арандатушылық жасады деп күдіктеледі.
Белгілі болғандай, өткен жылдың шілдесінде Тимур Садвақасов пен адвокат Санат Құрманбаев тергеу астындағы «Тиолайн» компаниясының тең иелерінің бірі Виктор Долгалевтің бизнес-серіктестеріне қатысты сотқа дейінгі тергеуді бастау мәселесін шешуді ұсынған.
Мәселені шешу үшін тараптар 225 млн теңге сомасына келіскен. Алайда, параның бірінші бөлігі – 90 млн теңгені алғаннан кейін, Садвақасов пен Құрманбаев ақшаны иемденіп, алған міндеттемелерін орындамаған.
Кейіннен бұрынғы әкім орынбасары жауапкершілікке тартылудан қорқып, соттан жасырынған. Шекараны заңсыз кесіп өткеннен кейін оны Өзбекстан шекара қызметінің қызметкерлері ұстап, заңсыз кіру фактісі бойынша қылмыстық іс қозғаған.
«Ағымдағы жылдың 25 ақпанында Түркістан облысының «Қапланбек» өткізу пунктінде Садвақасов Т.Х. ҚМА қызметкерлеріне тапсырылып, кейін Шымкент қаласының тергеу изоляторына орналастырылды. Жақын арада ол Павлодар қаласының тергеу изоляторына жеткізіледі», - делінген хабарламада.
Кейіннен іс Павлодар облысының қылмыстық істер жөніндегі мамандандырылған ауданаралық сотында қаралады.
Еске салайық, өткен жылдың ақпан айының басында солтүстікқазақстандық полицейлер «Тиолайн» компаниясының тең иелерінің бірі Виктор Долгалевті ұстаған болатын. Ол заңсыз кәсіпкерлік және жер қойнауын өз бетінше пайдалануда айыпталған.
Тергеу деректері бойынша, 2021 жылдың наурыз айында индустрия және инфрақұрылымдық даму министрлігі «Тиолайн» компаниясының 38 млрд теңге көлеміндегі қаржылық міндеттемелерін бұзуына байланысты «Обуховское кен орны» бойынша жер қойнауын пайдалану келісімшартын мерзімінен бұрын бұзған. Сонымен қатар, уәкілетті органдар бюджетке салықтар мен төлемдерді шамамен 2 млрд теңге сомасына төлеуден жалтару фактілерін анықтаған.