Бұрын кәсіпкер Қайрат Боранбаевқа тиесілі «Phystech II» АҚ 2025 жылы жекешелендірілуге жататын компаниялар тізіміне енгізілді. Тиісті қаулыға премьер-министр Олжас Бектенов қол қойды.
Ratel.kz мәліметінше, кәсіпорынды ашық конкурс, электрондық аукцион немесе тікелей мекенжайлық сату әдісі арқылы өткізу жоспарлануда.
Белгілі болғандай, 2023 жылдың қазанына дейін «Phystech II» АҚ-ның түпкілікті бенефициары Дариға Назарбаеваның құдасы – Қайрат Боранбаев болған.
Компания Маңғыстау облысындағы Солтүстік Қаражанбас кен орнында мұнай өндірумен айналысатыны атап өтілді.
2025 жылғы қаңтарда «Самұрық-Қазына» қоры Қаржы министрлігінен «Phystech II» АҚ акцияларының 100% алды. Бағалы қағаздар 8,1 млрд теңгеге бағаланды, ал бұған дейін Қаржылық мониторинг агенттігі (ҚМА) 35,4 млрд теңге сомасын келтірген болатын.
Еске салайық, 2023 жылғы наурызда кәсіпкер Қайрат Боранбаев, оның серіктесі Роман Наханов және QazaqGaz басқарма төрағасының бұрынғы орынбасары Тайыр Жанузақ квазимемлекеттік секторда аса ірі көлемдегі қаражатты жымқырғаны үшін 8 жыл бас бостандығынан айыруға сотталды.
Кейін хабарланғандай, Боранбаев мемлекет меншігіне ерікті түрде құны 90 млрд теңгеден астам активтерді қайтарып, Білім беру инфрақұрылымын қолдау қорына 30 млрд теңге аударған.
2023 жылғы қарашада Боранбаев колониядан шықты. 2024 жылғы мамырда ҚМА төрағасының орынбасары Жеңіс Елемесов журналистерге Боранбаевтың жалпы мемлекетке 134,5 млрд теңгені қайтарғанын айтты.