Қаржы министрі Мәди Такиев үкімет отырысында Қазақстанда жалпы декларациялаудың соңғы кезеңінің күші жойылғанын мәлімдеді.
«Қазинформ» ХАА деректері бойынша, алғашқы үш кезең аясында жалпы декларациялау жүйесі 4,8 млн адамды (мемлекеттік қызметшілерді, коммерциялық ұйымдардың, квазимемлекеттік сектордың басшылары мен құрылтайшыларын және олардың жұбайларын) қамтыды.
Белгілі болғандай, Президент тапсырмасын іске асыру аясында министр Такиев қалған 8 млн адамды (жеке құрылымдар қызметкерлерін, зейнеткерлерді, үй шаруасындағы әйелдерді, студенттерді және басқаларды) декларацияларды ұсыну міндетінен босатуды ұсынды.
Оның айтуынша, жалпы декларациялау тұжырымдамасы қабылданған сәттен бастап 14 жыл өтті. Осы уақыт ішінде:
- мемлекеттік органдар мен уәкілетті ұйымдардың дерекқорлары цифрландырылды;
- қолма-қол ақшасыз төлемдердің үлесі 86%-ға жетті;
- қаржылық және валюталық бақылау күшейтілді;
- халықаралық келісімдер (Страсбург конвенциясы, FATCA, ТМД — 100-ден астам ел) аясында қаржылық шоттар бойынша деректер алмасу жолға қойылды;
- цифрлық қызметтер кеңінен таралды.
«Осыған байланысты автоматтандырылған салықтық бақылау мүмкіндіктерін және мемлекет басшысының жалпы декларациялау тәсілдерін қайта қарау туралы тапсырмасын іске асыруды ескере отырып, азаматтардың осы санатын активтер мен міндеттемелер туралы декларацияларды ұсынудан босату ұсынылады. Босату осы санаттағы жеке тұлғалардың 90%-дан астамын қамтиды», — деді Мәди Такиев.
Бұл ретте декларациялау келесі азаматтар үшін сақталуы ұсынылады:
- ҚР шегінен тыс активтері барлар;
- жыл ішінде құны 20 мың АЕК-тен (74 млн теңге) асатын сатып алулар жасағандар;
- өз бетінше салық салынатын кіріс алғандар.
Сонымен қатар, азаматтарға ерікті түрде декларациялау құқығын беру жоспарлануда.
«Салықтық бақылауға келетін болсақ, жеке тұлғалардың қолданыстағы активтерін тіркеу үшін барлық цифрлық дерекқорлардан, оның ішінде екінші деңгейдегі банктерден мәліметтер алу тетігі қамтамасыз етіледі. Тиісті заңнамалық түзетулер дайындалды», — деп қосты министр.
15 қарашада Астанада өткен Ауыл шаруашылығы қызметкерлерінің бірінші форумында Қасым-Жомарт Тоқаев декларациялаудың соңғы кезеңін жою мәселесін қарауды тапсырғаны атап өтілді.
Еске салайық, сәуір айында Қазақстан Халық Партиясының (ҚХП) Мәжіліс депутаттары декларация тапсыру кезінде жеке деректердің қауіпсіздігіне күмән келтірді.
Сол кезде қаржы вице-министрі Ержан Біржанов декларацияларға қол жеткізу тек арнайы бұйрық бойынша шектеулі қызметкерлер шеңберіне берілетінін, олар ақпараттың құпиялылығы мен қауіпсіздігі үшін жеке жауапкершілікте болатынын жеткізді.