2023–2025 жылдарға арналған Балаларды зорлық-зомбылықтан қорғау, суицидтің алдын алу және олардың құқықтарын қамтамасыз ету жөніндегі кешенді жоспар аясында Алматыда арнайы балаларға арналған SIM-карта іске қосылды. Жобаны Бас прокурордың тапсырмасы бойынша қала прокуратурасы TELE2/ALTEL байланыс операторымен бірлесіп жүзеге асырды.
Бас прокуратура баспасөз қызметінің мәліметінше, «SIM KIDS» деп аталатын SIM-карта кәмелетке толмағандардың интернетке қауіпсіз қол жеткізуіне арналған. Жүйе зиянды және деструктивті контентті автоматты түрде сүзгіден өткізіп, ықтимал қауіпті ресурстарға кіруді шектейтіні хабарланады. Сонымен қатар, ата-аналар баланың қосымшалардағы белсенділігін бақылай алады және дыбыссыз режим қосулы болса да онымен байланыса алады.
Жоба сынақ кезеңінен өтті және қазір барлық тілек білдірушілерге қосылу үшін қолжетімді.
Бұл бастама кәмелетке толмағандардың цифрлық қауіпсіздігін арттыруға және онлайн-ортаның теріс әсерінің алдын алуға бағытталған.
Бұған дейін біз қазақстандықтардың, оның ішінде миллиондаған телефон нөмірлерінің жеке деректерінің ағып кетуі туралы жазған болатынбыз. «SIM KIDS» жобасы аясында балалардың нөмірлері бар деректер базасын қорғауды қаншалықты тиімді қамтамасыз етуге болатынын уақыт көрсетеді.