Мемлекеттік сатып алу порталын мониторингілеу кезінде журналистер Шығыс Қазақстан облысы Алтай ауданының «Ладушки» балабақшасының жұмыс жоспарындағы ірі сомаға назар аударды.
Ratel.kz деректеріне сәйкес, мекеме ақпараттық ресурстарға қол жеткізу қызметін 154 189 000 теңге сомасына сатып алуды жоспарлаған.
Порталда көрсетілгендей, сатып алу жалғыз көзден тікелей шарт жасасу жолымен жүргізілген және шарт күшінде. Алайда мемлекеттік сатып алу сайтында құжаттың өзі болмаған.
Журналистер Алтай ауданы әкімдігіне мектепке дейінгі мекеменің қандай ақпараттық ресурстарға қол жеткізетінін, тізімге қандай қызметтер кіретінін, мұндай елеулі соманың қаншалықты негізді екенін және бюджеттен осындай ауқымды шығындарды болдырмауға бола ма деген сұрақтармен сауал жолдады.
Аудандық білім беру бөлімінде журналистерден кем емес таңғалғандарын айтты. Олардың мәлімдеуінше, жоспарлануы тиіс сома 200 мың теңгеден сәл асады.
«ШҚО ББ Алтай ауданы бойынша ББ «Ладушки» балабақшасы» КМҚК 2018 жылғы қыркүйекте «Марат-Султан» ЖШС сенімгерлік басқаруына 5 жыл мерзімге берілді. 2024 жылы шарт тағы 7 жылға ұзартылды, сондықтан мемлекеттік сатып алу порталында жұмыс жүргізілмейді. Мемлекеттік сатып алу веб-порталына қосылу қажеттілігіне байланысты «Электрондық қаржы орталығымен» шарт жасалды», - делінген жауапта.
Ведомство мемлекеттік сатып алу порталында шарт жоқ екенін, себебі ол бір көзбен жасалғанын және нақты қызметтер мен сатып алулар емес, тек қол жеткізу ақысы төленетінін түсіндірді. Сонымен қатар, білім бөлімінде бухгалтер сатып алу сомасын көрсету кезінде қателік жібергенін мәлімдеді.
«Бухгалтер ақпараттық ресурстарға қол жеткізу бойынша шарт сомасын көрсету кезінде қателік жіберген. Іс жүзінде шарт 154 189 000 теңгенің орнына 210 642,86 теңге сомасына жасалуы керек еді», - деп жауап берді Алтай ауданының білім бөлімі.
Журналистердің сауалынан кейін уәкілетті орган жоспар сомасына өзгерістер мен түзетулер енгізу үшін мемлекеттік сатып алу веб-порталының техникалық қолдау қызметіне қате шартты жою туралы өтініш жолдады.