Қаржы мониторингі агенттігі (ҚМА) 2024 жылы азық-түлік тауарларына бағаны негізсіз көтерудің 817 фактісін анықтап, 685 ұйымның мемлекеттік сатып алу шарттарын қайта қарады, бұл 370 млн теңгеден астам қаражат үнемдеуге мүмкіндік берді.
Ведомство баспасөз қызметінің мәліметінше, ҚМА қызметкерлері 69 делдалды алып тастап, бұзушылар 11 млн теңге көлемінде айыппұл төлеген 600 әкімшілік хаттама жасаған.
Мәселен, Ақтөбе облысының 80 балабақшасында қарақұмық, картоп, сәбіз, қант, жұмыртқа және тұз бағасын төмендетуге қол жеткізілді. Аймақтағы мектепке дейінгі мекемелердің бірінде кәсіпкер қарақұмықты 500%-дан астам үстемемен жеткізгені атап өтілді.
Қостанайда үстеме бағасы 180%-ға дейін жеткен қарақұмық, қант, пияз, картоп және жұмыртқа сатып алған 117 әлеуметтік мекеме анықталды.
«ҚМА жергілікті департаментінің араласуынан кейін өңірдегі барлық мемлекеттік мекемелерде қосымша келісімдер жасалып, нәтижесінде 60 млн теңгеге жуық қаражат үнемделді. Астана және Қарағанды облысында 175 балабақша бойынша осындай жұмыс жүргізіліп, 100 млн теңгеден астам қаражат үнемделді», - делінген хабарламада.
Бағаның негізсіз өсуіне жол бермеу үшін ҚМА мемлекеттік мекемелерге өнімді өндірушілерден және ірі көтерме сатушылардан сатып алуды ұсынды.
Сонымен қатар, ведомство сауда үстемелерінің асып кетуі үшін заңсыз алынған кіріске тең келетін айыппұлдар қолдана отырып, әкімшілік жауапкершілікті күшейтуді ұсынды.
Еске салайық, өткен жылдың сәуір айында ҚМА ШҚО-да әлеуметтік маңызы бар азық-түлік тауарларының (ӘМАТ) сатып алу бағасын төмендеткен. Сонда Ерекше білім беру қажеттіліктері бар балаларды қолдау орталығы өнімдерді асыра бағамен сатып алғаны анықталды. Нәтижесінде сәбіздің сатып алу бағасы 35% -ға (325 теңгеден 242 теңгеге дейін), қырыққабат 60% -ға (380 теңгеден 238 теңгеге дейін) төмендетілді.
Мамыр айында ҚМА қызметкерлері Астана балабақшаларына жеткізілетін ӘМАТ-қа бағаны негізсіз көтеру фактілерін анықтаған. Ведомство 21 мектепке дейінгі мекемеде өнім жеткізу шарттары бойынша бағаны төмендетуге қол жеткізді. Үнемдеу 31 млн теңгеден асты.
Қазан айында Павлодар облысында мектепке дейінгі мекемелерде өнім бағасының үш есеге жуық асыра бағаланғаны анықталып, үнемдеу 30 млн теңгеден астамды құрады.