Бәсекелестікті қорғау және дамыту агенттігі (БҚДА) 2025 жылғы ақпаннан бастап сымды интернетке тарифтердің көтерілуіне байланысты Beeline («КаР-Тел» ЖШС) ұялы байланыс операторына қатысты тексеруді бастады. Ведомство оператордан бағаның өсуінің негізділігін талдау үшін құжаттаманы сұратты.
Bes.media деректері бойынша, БҚДА оператор әрекеттерінің үстемдік етуші компанияларға монополиялық жоғары бағалар белгілеуге тыйым салатын «Бәсекелестік туралы» ҚР Кодексінің 174-бабына сәйкестігін тексереді.
Сонымен қатар Агенттік ықтимал бәсекеге қарсы схемаларды анықтау үшін 2024 жылғы тарифтер бағасының динамикасын талдайды. Бұзушылық расталған жағдайда байланыс операторына жылдық кірістің 5%-не дейін айыппұл және монополиялық кірістерді тәркілеу қаупі төнеді.
Белгілі болғандай, бұрын Beeline клиенттері 2025 жылғы ақпаннан бастап интернет құнының 4990 теңгеден 5990 теңгеге дейін көтерілгені туралы хабарландыру алған. Бұл ретте өткен жылы да тарифтер бағасының осындай өсуі байқалған.
Оператор көтерілуді инфляциямен, теңгенің девальвациясымен және инфрақұрылымға инвестициялармен түсіндіреді. Сонымен қатар, «КаР-Тел» ЖШС деректері бойынша, бір жыл ішінде клиенттердің деректерді тұтынуы 40%-ға өсті.
Белгіленген бағаларға көңілі толмайтындарға Beeline отбасылық тарифтерге немесе трафигі аз пакеттерге ауысуды ұсынатыны атап өтіледі.
Еске салайық, өткен жылдың мамыр айында БҚДА төрағасы Марат Омаров баяндағандай, ведомство ҚР үш ұялы байланыс операторын (Kcell, Tele2/Altel, Beeline) тарифтерді көтеруге қатысты сөз байласуда күдіктенген. Сонда ол оларға қатысты тексеру аяқталып, қорытындылары шығарылып, белгілі бір сот процестері басталғанын атап өткен.
Кейінірек БҚДА компанияның тарифтердің, оның ішінде үй интернетінің қымбаттауы туралы мәлімдемесінен кейін «Қазақтелеком» АҚ-на ескерту жолдады. Қазан айында БҚДА соттар аяқталғанға дейін байланыс операторларына қатысты тергеуді тоқтатты.