Бас прокуратура алименттерді жеке сот орындаушыларының (ЖСО) жымқырғанын хабарлады.
«Қазінформ» ХАА деректері бойынша, ЖСО Аблахан А. алты ай бойы борышкерлерден алимент төлемдерін алып, оларды жеке қажеттіліктеріне жұмсаған. Нәтижесінде 34 бала 1,2 млн теңге көлемінде залал шеккен. Аблаханға қатысты сотқа дейінгі тергеу басталып, оның барысында ол залалды толық көлемде өтеген. Кейін іс тараптардың татуласуына байланысты тоқтатылған.
Басқа жағдайда ЖСО Оспанов Н. түскен 1 млн теңге алиментті өз ұлының шотына аударған. Қаңтар айында ЖСО-ға қатысты сотқа дейінгі тергеу басталып, кейін іс сотқа жолданған. Қылмыстық іс тараптардың татуласуына байланысты тоқтатылған. Залал толық көлемде өтелген.
Соңғы 2 жылда прокуратураға ЖСО әрекеттеріне 6 973 шағым түскені атап өтіледі. Негізінен, олар сот актілерін орындамау, сот орындаушыларының әрекетсіздігі және олардың борышкерлерге қатысты шара қолданбауына қатысты болған.
Сонымен қатар, 2022 жылы прокурорлар ЖСО-ның өндіріп алушылардың ақшасын 1,1 млрд теңге көлемінде заңсыз иеленгенін анықтаған.
«Борышкерлерден ағымдағы шоттарға қаражат түскеннен кейін, ЖСО оларды қолма-қол алып, банктердегі өз депозиттеріне аударып, пайыздар алып, жұбайларына аударып, өз қалауы бойынша иелік еткен. Анықталған деректер бойынша полиция органдары ҚК-нің 251-бабы бойынша (ЖСО өкілеттіктерін теріс пайдалану) 16 сотқа дейінгі тергеуді бастаған. Кейін залалды толық өтеуге байланысты қылмыстық істер тоқтатылды», — делінген хабарламада.
Осыдан кейін бас прокуратура Әділет министріне ЖСО ағымдағы шоттарын бақылау жүйесін енгізу туралы ұсыныс енгізген. Тексеру қорытындысы бойынша 9 ЖСО-ның лицензиясы тоқтатылып, 55 адам тәртіптік жазаға тартылған.
Еске салайық, өткен жылдың қараша айында Қостанай облысының прокуратурасы анықтағандай, өңірдің сот орындаушылары қайтыс болған борышкерлерге қатысты атқарушылық іс жүргізуді жаппаған. Ал заң бойынша өндіріп алушы қайтыс болған жағдайда орындаушы бір жұмыс күні ішінде іс жүргізуді тоқтатуға міндетті.
Осы жылдың қыркүйегінде прокуратура актісі бойынша 50 ЖСО тәртіптік жауапкершілікке тартылып, біреуіне қатысты сот орындаушылар палатасынан шығару рәсімі басталған. Қабылданған шаралар нәтижесінде борышкерлерден 75 млн теңгеден астам қаражат өндірілген.
Мамыр айында Тараз прокурорлары анықтағандай, жеке сот орындаушысы ақша қаражатын жымқырған. 46 борышкерден жиналған 3,1 млн теңгені ол өз шотына аударған.