Астанада бұрын ҰҚК төрағасы және экс-премьер-министр Кәрім Мәсімовке тиесілі болған оңаша үйді коммуналдық меншікке беру жоспарланбайды. Бұл туралы елорданың активтер және мемлекеттік сатып алу басқармасы хабарлады.
Informburo.kz деректері бойынша, Нұра ауданының Қараөткел шағын ауданында орналасқан оңаша үй әлеуметтік қажеттіліктер үшін мүлікті қайтару рәсімі аясында алынған.
Сәуір айында қайтарылған активтерді басқару жөніндегі компания (ҚАБК) объектіні беру туралы қала әкімдігінен ресми сұрау алғанын хабарлады. Алайда кейін әкімдікте ғимаратты қала балансына қабылдау мәселесі қаралмайтынын мәлімдеді.
«Астана қаласының активтер және мемлекеттік сатып алу басқармасы қазіргі уақытта жоғарыда аталған ғимаратты коммуналдық меншікке қабылдау жоспарланбайтынын хабарлайды», — делінген ресми жауапта.
Оңаша үй үш рет саудаға шығарылды. Соңғы аукцион 18 сәуірде 1,6 млрд теңге бастапқы бағамен өтті. Бұрын үйді 1,8 млрд теңгеге сатуға тырысқан, бірақ сатып алушылар табылмаған. Сондай-ақ, ҚАБК басшысы Қуанышбек Мұқаш бұрын мәлімдегендей, оңаша үйдегі сән-салтанат бұйымдарын бөлек сату мүмкіндігі талқылануда.
Еске салайық, 2023 жылғы сәуірде Кәрім Мәсімов мемлекетке опасыздық жасау, билікті күшпен басып алу әрекеті, билікті асыра пайдалану және лауазымдық өкілеттіктерді асыра пайдалану үшін 18 жылға бас бостандығынан айыруға сотталды.