Антикор Қазақстанның спорт саласындағы негізгі проблемаларды атап көрсетті: дамымаған инфрақұрылым және бірыңғай цифрлық платформаның жоқтығы.
Ведомствоның баспасөз қызметі хабарлағандай, спорт нысандарының жетіспеушілігі спортшыларды сапалы дайындау мүмкіндігін төмендетеді, ал бұл салада цифрландырудың болмауы спортшыларды бұлыңғыр іріктеуге және «жалған спортшыларды» марапаттауға әкеп соғады.
Спорттық инфрақұрылымның жетіспеушілігі мәселесі, әсіресе, спорт нысандары мүлдем жоқ немесе жарамсыз күйде болатын өңірлерде айқын байқалады.
Қазақстанда жабық спорт ғимараттарының - 374,2 мың м2 және бассейндердің - 376,4 мың м2 тапшылығы байқалатыны хабарланады. Ең үлкен тапшылық Алматы қаласында, Астана қаласында, сондай-ақ Түркістан және Алматы облыстарында сезіледі.
Алайда, өткен жылы бекітілген 2023 – 2029 жылдарға арналған дене шынықтыру және спортты дамыту тұжырымдамасы спорт саласындағы қажеттіліктерді толық көрсетпейді, керісінше, екінші дәрежелі мәселелерге: қарапайым жаяу жүргіншілер жолдары мен велосипед жолдарының жетіспеушілігіне назар аударады.
Спорт кешендері мен футбол академияларын салудың орнына, айтарлықтай қаражат легионерлерді ұстауға кеткені атап өтіледі.
«Мысалы, ең қымбат «Астана» ФК (2018-2023 жж. 50 млрд теңге, құрылтайшысы – ҚР Спорт және дене шынықтыру істері комитетінің «Қазспортинвест» АҚ «Туризм және спорт индустриясын қолдау қоры» корпоративтік қоры және ҰОК) жеке футбол академиясы мен инфрақұрылымы жоқ. 6 жыл ішінде (2018-2023 жж.) клуб футбол алаңдары мен үй-жайларды жалға алуға 1,4 млрд теңге жұмсады», - деп хабарлады Антикорда.
Қазақстандық спортты цифрландыруға келер болсақ, Антикор профильді министрлік қазақстандық спорттың жай-күйі туралы өзекті деректерге ие емес екенін, себебі 2020 жылы жоспарланған Ұлттық цифрлық платформа E-sport енгізу жүзеге аспағанын хабарлайды.
«…мұндай жағдай бюджет қаражатын бақылаусыз игеруге әкеліп соқты, бұл өз кезегінде аффилиирленген жеткізушілерді іріктеумен, оқу-жаттығу жиындары мен спорт нысандарын жалға алудың жалғандығымен, легионерлердің еңбек ақысын негізсіз көтерумен, қосарланған қаржыландырумен ұштасты», - деп атап өтті Антикорда.
Талдау қорытындысы бойынша ведомство спорт саласын дамыту бойынша ұсынымдарды енгізді, атап айтқанда, «жаппай және балалар спортына арналған бюджетті ұлғайту, қаржыландыруды орталықтандыру, меншікті инфрақұрылым мен балалар академияларын дамыту, сондай-ақ цифрландыруды енгізу».