Бәсекелестікті қорғау және дамыту агенттігі (БҚДА) «Атырау мұнай өңдеу зауыты» ЖШС (АМӨЗ) қатысты тергеу бастады.
БАҚ мәліметінше, тергеу мұнай өңдеу бағасын негізсіз көтеру фактілері бойынша жүргізілуде.
«ҚР Бәсекелестікті қорғау және дамыту агенттігінің Атырау облысы бойынша департаменті «Атырау мұнай өңдеу зауыты» ЖШС (АМӨЗ) қатысты тергеу бастады, оған мұнай өңдеу тауар нарығындағы тауар бағасы мен өндіріс (өткізу) көлемінің динамикасына жүргізілген талдау негіз болды», - делінген хабарламада.
Талдау барысында БҚДА қызметкерлері мұнай өңдеуге монополиялық жоғары баға белгілеу арқылы үстемдік жағдайын теріс пайдалану белгілерін анықтаған.
Белгілі болғандай, 2021-2023 жылдар аралығында бұл саладағы орташа баға 31%-ға өскен.
«Айта кету керек, монополиялық жоғары баға белгілеу фактісі Қазақстан Республикасының бәсекелестікті қорғау саласындағы заңнамасының ықтимал бұзылуын тергеу барысында анықталады», - деп қорытындылады БҚДА.
Еске сала кетейік, қаңтар айының басында желіде Антикоррупциялық қызмет АМӨЗ бас директоры Ғалымжан Жусанбаев және оның орынбасарлары Рәспекова мен Есқалиевке қызығушылық танытқаны туралы ақпарат пайда болды. БАҚ зауыт басшылығын аса ірі көлемде пара алуға (ҚК 366-бабының 4-бөлігі) күдіктейді деп мәлімдеген.
Кейін АМӨЗ баспасөз қызметі бұл ақпаратты жоққа шығарды. Компания құқық қорғау органдарынан ресми хабарлама немесе сұрау түспегенін хабарлады.