Алматы қаласының Ішкі мемлекеттік аудит департаменті бейжайлы емес азаматтың өтініші бойынша «Қазақстан Республикасы Минералды шикізатты кешенді қайта өңдеу жөніндегі ұлттық орталық» РМК тексеру жүргізді. Бұл өнеркәсіп және құрылыс министрлігінің өнеркәсіп комитетінің ведомстволық бағыныстағы ұйымы.
Қаржы министрлігінің Ішкі мемлекеттік аудит комитеті баспасөз қызметінің мәліметінше, аудит жекелеген қызметкерлерге жалақы мен сыйлықақылардың есептелу негізділігін тексеруге бағытталған. Нәтижесінде сарапшылар 2024 жылы нақты жұмыс істемеген уақыт үшін еңбекақы төлеуге байланысты 14,2 млн теңге сомасындағы қаржылық бұзушылықтарды анықтады.
Тексерілген активтер мен қаражаттың жалпы көлемі 188,9 млн теңгені құрады. Еңбекақы төлеу бөлігіндегі бұзушылықтардан басқа, аудиторлар 34,4 млн теңге сомасына процедуралық ауытқуларды тіркеді, оның ішінде:
- үш қашықтықтан жұмыс істейтін қызметкермен еңбек шарттарының болмауы — 3,7 млн теңге;
- үш жұмысшының жұмыс уақытының рұқсат етілген нормасынан асып кетуі — 12,7 млн теңге;
- ғылыми-техникалық бағдарлама үшін конкурстық құжаттама дайындау қызметтеріне негізсіз шығыстар — 18 млн теңге.
Тексеру қорытындысы бойынша комитет бұзушылықтарды жою және кінәлі лауазымды адамдардың жауапкершілігі мәселесін қарау туралы ресми нұсқама берді. Материалдар қылмыстық қудалау органдарына берілді, нұсқаманың орындалуы ерекше бақылауда.
Естеріңізге сала кетейік, бұған дейін Ақтау прокуратурасы мұнай өңдеумен айналысатын «Mangystau OilRefining» ЖШС жалақы төлеу кезінде заңнаманың сақталуына талдау жүргізген болатын. Анықталғандай, қаңтардан наурызға дейін кәсіпорын 241 қызметкерге жалақы төлемеген. Жалпы берешек сомасы 197 млн теңгені құрады.