Алматыда заңсыз «Creditum», «Sofi Finance», «Hava Finance», «SF Offline», «POS Credit» және «Салем Кредит» шағын несие ұйымдарын (ШНҰ) ұйымдастырушылардың мүлкіне 32 млрд теңге сомасында тыйым салынды.
Қаржылық мониторинг агенттігінің (ҚМА) баспасөз қызметінің мәліметінше, осы ШНҰ-ның заңсыз әрекеттері салдарынан 327 мыңнан астам азамат зардап шегіп, оларға 30 млрд теңге көлемінде залал келтірілген.
Бұған дейін белгілі болғандай, төлемдері кешіктірілген қарыз алушыларды «Hava Finance», «SF Offline» және «POS Credit» еншілес компанияларымен кепілдік шарттарын жасасуға мәжбүрлеген. Бұл ретте кепіл берушінің жауапкершілігі тек қарыз алушы қайтыс болған жағдайда ғана туындаған.
«Осы «қызмет» үшін бастапқы несие сомасынан бірнеше есе артық ақы алынды, бұл азаматтарды қарыз тұзағына түсірді. Нәтижесінде қарыз алушылар несие сомасынан 3-5 есе көп төледі», - делінген хабарламада.
ШНҰ шоттарына 1,8 млрд теңге сомасына, сондай-ақ 30 млрд теңге мөлшеріндегі несие портфеліне тыйым салынды.
Ұйымдастырушылардың бірі 2 ай мерзімге қамауға алынды. Оның жалпы құны 225 млн теңге болатын 2 тұрғын үйі мен BMW X6 және Toyota Tundra автокөліктеріне тыйым салынды.