Су ресурстары және ирригация министрлігінің ішкі аудит департаменті 2024 жылы жүргізілген «Қазсушар» РМК филиалдарының аудит қорытындылары туралы айтты.
Ведомствоның баспасөз қызметінің мәліметінше, тексерістерден кейін 30-дан астам адам әкімшілік жауапкершілікке, ал бірнеше лауазымды тұлға тәртіптік жауапкершілікке тартылды.
Мысалы, Алматы облысының «Алатау» филиалында бұрын жұмыстан босатылған қызметкерлер тарапынан алаяқтық фактілері анықталды.
«Жүргізілген аудиттер азаматтарды ауызсу және суару суымен қамтамасыз етуді жақсарту үшін қолданыстағы заңнаманы одан әрі жетілдіру қажеттігін көрсетті. Анықталған барлық бұзушылықтар бойынша материалдар құқық қорғау органдарына жіберілді. Сондай-ақ министрліктің құзыретті құрылымдары мен ведомстволарына ұсыныстар мен тапсырмалар берілді», – деді ішкі аудит департаментінің директоры Ғалымжан Молдаш.
Еске сала кетейік, өткен жылдың маусым айында Жамбыл облысында жүргізілген аудит су ресурстарын заңсыз пайдаланудың 10-ға жуық фактісін, сондай-ақ ауыл шаруашылығы тауарын өндірушілермен суару суын беруге жасалған келісімшарттардағы бұзушылықтарды анықтады.
Шілде айында Жамбыл облысындағы филиал директоры мен Шу-Талас бассейндік инспекциясының басшысы тәртіптік жауапкершілікке тартылды.
Қыркүйек айында ішкі аудит қорытындысы бойынша Жамбыл облысы бойынша «Қазсушар» РМК филиалының директоры мен Асы өндірістік учаскесінің басшысы лауазымынан босатылды.
Қазан айында су ресурстары және ирригация министрлігі «Қазсушар» филиалдарында суды заңсыз пайдалану, су ресурстарын тиімсіз пайдалану және мемлекеттік сатып алуларға байланысты 20 млн теңгеге бұзушылықтарды анықтады.