Желіде құқық қорғау органдарының «Ақтөбе» ФК басшылығына сұрақтары бар екендігі туралы ақпарат пайда болды.
Telegram-арнасының «Серый CARDINAL» деректері бойынша, Сергей Куленконың клуб басшысы қызметінде жұмыс істеген кезеңінде лауазымды тұлғалар 2023 жылы бағасы өте жоғары чартерлік рейстер ұйымдастырған.
Ішкі мемлекеттік аудит департаментінің (ІМАД) бағалауы бойынша осылайша 165 млн теңге көлемінде ұрлық жасалғаны хабарланады.
«Қазір іс Сыбайлас жемқорлыққа қарсы қызметке берілді. «Ақтөбе» ФК лауазымды тұлғаларының кінәсін дәлелдей алса, оларға 7 жылдан 12 жылға дейін бас бостандығынан айыру жазасы қауіп төндіруі мүмкін», - делінген хабарламада.
Еске сала кетейік, бұрын «Жетісу» футбол клубының спорттық директоры Дәулет Иманқұлов 5,5 млн теңге ұрлағаны үшін кінәлі деп танылды. Оған 3 жыл 6 ай бас бостандығын шектеу жазасы тағайындалды.
Сонымен қатар, маусым айында «Жетісу» ФК директоры Қалмұхамет Дөнсебаев ұсталды. Қамауға алу себептері сол кезде хабарланбады, алайда бірқатар БАҚ Сыбайлас жемқорлыққа қарсы қызметке сілтеме жасап, Дөнсебаев 85,4 млн теңге көлеміндегі бюджет қаражатын ұрлады деген күдікке ілінгенін хабарлады.
Осыдан басқа, "Қазақстан футбол федерациясының" президенті Әділет Барменқұлов УЕФА басшылығының сенімінен айырылғаны хабарланды, осыған байланысты Еуропалық футбол қауымдастықтары одағы оған қатысты тергеу жүргізуде.
Белгілі болғандай, УЕФА Барменқұловтың қазақстандық футбол клубтарының жалған матчтар өткізетінін біле тұра әрекетсіздік танытқанын және оның жеке мүдделілік дәрежесі қандай екенін тексереді.