Премьер-министр Олжас Бектенов мемлекетке заңсыз сатып алынған активтерді қайтару жөніндегі комиссия отырысында қайтарылған активтерді басқару компаниясының (ҚАБК) жүргізіп жатқан жұмысы туралы есепті тыңдап, сондай-ақ алдыңғы шешімдердің орындалу нәтижелерін қарады.
Үкімет баспасөз қызметінің мәліметінше, мемлекетке шамамен 610 млрд теңге сомасындағы активтер қайтарылды, оның 506 млрд теңгесі – ақша қаражаты, сондай-ақ құны 103 млрд теңгеден астам мүлік.
Белгілі болғандай, Арнайы мемлекеттік қордан білім беру, денсаулық сақтау, спорт, әлеуметтік қамсыздандыру салаларындағы 280 әлеуметтік нысанды іске асыруға, сондай-ақ коммуналдық инфрақұрылымды жаңғыртуға қаражат бөлінді.
«Кезекті отырыстың қорытындысы бойынша Комиссия мемлекетке заңсыз сатып алынған активтерді ерікті түрде қайтару туралы бірқатар келісімдердің жасалуын мақұлдады», - делінген хабарламада.
Сонымен қатар Арнайы мемлекеттік қорға қосымша шамамен 150 млрд теңге жіберу жоспарлануда. Оған қоса, уәкілетті органдар ел экономикасына $10,5 млрд инвестициялау жөніндегі міндеттемелерді қабылдады.
«Комиссия «Мемлекетке заңсыз сатып алынған активтерді қайтару туралы» ҚР Заңының қолданысына жататын тұлғаларға қатысты жалпы сомасы 84 млрд теңгеден астам активтерді мемлекет кірісіне айналдыру туралы сотқа талап-арыздар енгізуді қолдады», - деп хабарлады үкіметте.
Еске сала кетейік, бұған дейін 2022-2024 жылдар аралығында мемлекетке шамамен 1 трлн теңге сомасындағы активтер қайтарылғаны хабарланған болатын. Оның 220 млрд теңгеден астамы Арнайы мемлекеттік қорға жіберілсе, қалған бөлігі жарғылық капиталына мемлекет толық қатысатын қайтарылған активтерді басқару компаниясына берілді.