Ақмола облысының полицейлері Целиноград ауданында деструктивті діни ағымның ұстанушысынан заңсыз майнинг жабдығын анықтады.
Ведомствоның баспасөз қызметінің мәліметінше, майнинг фермасын Ішкі істер министрлігінің экстремизмге қарсы іс-қимыл бөлімшелері мен Ақмола облысы полиция департаментінің қызметкерлері анықтаған.
Тінту кезінде жедел қызметкерлер 200-ден астам майнинг блогын, 27 майнинг платформасын, ұялы телефондарды, ноутбукты, сондай-ақ діни әдебиеттерді тәркіледі. Осы факті бойынша қылмыстық іс қозғалып, тергеу шаралары жүргізілуде.
Еске сала кетейік, өткен жылдың қыркүйек айының басында Президент Қасым-Жомарт Тоқаев криптовалюта майнингімен айналысатын, экономикаға зиян келтіріп, көп мөлшерде электр энергиясын тұтынатын және салықтарды тиісті мөлшерде төлемейтін кәсіпкерлермен «айналысу» қажеттігі туралы мәлімдеген болатын.
Президенттің сөйлеген сөзінен кейін 10 күн өткен соң ҚМА Қостанай облысында заңсыз майнерлердің қызметінің жолын кесілгені туралы хабарлады. Қылмыскерлер үш аудан орталығының, 27 орта мектептің немесе 13 аурухананың қажеттіліктеріне тең электр энергиясын тұтынып, жергілікті электр желілеріне орасан зор жүктеме түсірген.
Кейінірек ҚМА қызметкерлері Астанада қозғалтқыштарды өңдеу орталығының атын жамылып, майнинг фермасын ұйымдастыру фактісі бойынша тергеуді аяқтады. Кәсіпорын бір тұрғын ауданның айлық қажеттілігімен салыстыруға болатын энергияны тұтынғаны хабарланды.
Қазанда Шымкентте криптовалюта өндіру үшін құпия майнинг фермасын ұйымдастырған екі азамат сотталды. Айыпталушылар 2023 жылдың сәуірінен 2024 жылдың ақпанына дейін 100 млн теңгеден астам кіріс алған.
Желтоқсанда ҚМА Теміртауда заңсыз майнинг фермасын ұйымдастыру фактісін анықтады. Тінту кезінде құқық қорғау органдары 156 бірлік майнинг жабдығы мен басқа да қосалқы құрылғыларды тәркіледі.
Биылғы жылдың сәуір айында Астанада 2022 жылдан 2024 жылға дейін қозғалтқыштарды өңдеу орталығының атын жамылып, майнинг фермасын ұйымдастырған үш азаматқа үкім шығарылды. Қондырғы мегаполистің бір тұрғын ауданының айлық қажеттілігімен салыстыруға болатын энергияны тұтынғаны хабарланды.