2024 жылдың басынан бері Ақмола облысы бойынша экономикалық тергеу департаменті (ЭТД) қызметкерлері қаржылық және экономикалық салаларда 16 құқық бұзушылықты, оның ішінде алтынды, криптовалюталарды заңсыз айналымы, контрафактілік өнімдерді тарату және қаржылық пирамидаларды ұйымдастыру фактілерін анықтады. Бұл туралы ведомство басшысының орынбасары Алмас Баймұрзин хабарлады.
«Қазинформ» ХАА деректері бойынша, 2024–2025 жылдары ЭТД аффинирленген алтынды өндіру, сатып алу және өткізу, сондай-ақ зергерлік бұйымдар жасаумен айналысқан үш ұйымдасқан топтың қызметін тоқтатты. Екі топтың қатысушылары әртүрлі бас бостандығынан айыру мерзімдеріне сотталды, үшінші ұйымдасқан қылмыстық топқа қатысты екі қылмыстық іс қозғалып, сотқа дейінгі тергеу жүргізілуде.
Сонымен қатар, маусым айының басында департамент қызметкерлері контрафактілік тұрмыстық химия өндіретін жасырын цехты жойды. Қылмыскерлер «Domestos» тауар белгісін құқық иеленушінің рұқсатынсыз пайдаланғаны атап өтіледі. Тінту кезінде олардан 4 мың данадан астам дайын өнім бөтелкелері, жабдықтар, бос ыдыстар, затбелгілер және химиялық концентраттар тәркіленді.
Сонымен бірге Алмас Баймұрзин ЭТД қаржылық пирамидалардың бірнеше құрылымдық бөлімшелерін жойғанын хабарлады. Оның айтуынша, 2024 жылы «Charoit» және «Лайм академия» қаржы пирамидаларының филиалдары жабылып, олардың ұйымдастырушылары әртүрлі бас бостандығынан айыру мерзімдеріне сотталды. Тағы төрт адам осы схемаларды жарнамалағаны үшін қылмыстық жауапкершілікке тартылды.
2025 жылы ведомство қызметкерлері тағы төрт қаржы пирамидасының құрылымдық бөлімшелерінің қызметін тоқтатты: «Buyers Union», «S-Group», «Lemon», сондай-ақ Щучинск, Степногорск және Атбасар қалаларындағы «Asar Baspana»-ның үш филиалы.
Сондай-ақ ЭТД басшысының орынбасары аймақта криптовалютаның заңсыз айналымының екі фактісі анықталғанын мәлімдеді. Қатысушылар 800 млн теңгеден астам көлемде табыс тапқаны атап өтіледі. Сотқа дейінгі тергеу жүргізілуде. Айналымы 186 млн теңге деп болжанған осыған ұқсас эпизод бойынша істердің бірі сотқа жіберілді. Іс аясында 4 мың АҚШ доллары (1,8 млн теңге) тәркіленді.
Баймұрзиннің айтуынша, ағымдағы жылдың алғашқы айларында департамент әлеуметтік желілерде онлайн-казино мен қаржы пирамидаларын жарнамалаған, сондай-ақ криптовалютаны заңсыз айырбастаған сегіз чат пен аккаунтты бұғаттады.