Қаржылық мониторинг агенттігі (ҚМА) Қазақстан футбол федерациясының (ҚФФ) бұрынғы басшылығына қатысты сотқа дейінгі тергеуді бастады.
«Барлық тергеу әрекеттері заңнама талаптарына қатаң сәйкестікте жүргізіледі. Қазақстан Республикасы Қылмыстық-процестік кодексінің 201-бабына сәйкес өзге ақпарат жария етілмейді», – деп хабарлады ведомствоның баспасөз қызметі.
Өз кезегінде көптеген БАҚ тергеу ҚФФ-ның бұрынғы президенті Әділет Барменқұловқа және оның командасына қатысты жүргізіліп жатыр деп болжайды.
Еске салайық, Барменқұлов федерацияны 2022 жылдың ақпанынан 2024 жылдың қарашасына дейін басқарды. Желтоқсанда бұл лауазымды Марат Омаров иеленді. ФБРК редакциясы Әділет Барменқұловтың ҚФФ президенті қызметіндегі іс-әрекеті футбол жанкүйерлері тарапынан үнемі сынға ұшырап, тіпті УЕФА басшылығында да күмән тудырғаны туралы бірнеше рет жазған болатын.
Барменқұловтың футбол федерациясының басшысы қызметіндегі жұмысына жұртшылықтың неге наразы болғаны, ол қандай сыбайлас жемқорлық жанжалдарына араласқаны және қандай бизнесті иеленіп үлгергені туралы сілтеме бойынша оқуға болады.