Аягөз ауданының прокуратурасы Абай облысы 19 тауар түрінің 6-сында бағаның асыра көтерілгенін анықтады. Бұл ретте ауданның жергілікті атқарушы органдары облыстық орталыққа дәйексіз ақпарат беріп, нақты бағаларды төмендетіп көрсеткен.
Ведомство баспасөз қызметінің мәліметінше, мысалы, картоптың белгіленген бағасы 275 теңге болғанда, нақты құны 415 теңгені (+44%) құраған. Сәбіз, пияз, қырыққабат, сүт және айран бағасының да осыған ұқсас асыра көтерілуі анықталды.
«Заң талаптарына қайшы, жергілікті атқарушы органдар тиісті мониторингті қамтамасыз етпеген, бұл деректердің бұрмалануына және баға өсімін бақылаудың болмауына әкеп соқты. Сондай-ақ, ауданда халықтың осал топтары үшін әлеуметтік дүкендердің жоқтығы анықталды», - делінген хабарламада.
Прокурорлық араласу нәтижесінде мониторинг күшейтіліп, сауда нүктелерінде бағаның асыра көтерілуіне жол бермеу жөнінде жұмыс басталды. Соның нәтижесінде прокурорлар Аягөздегі екі дүкенмен әлеуметтік маңызы бар тауарларды төмендетілген бағамен сату туралы келісімге қол жеткізді.
Естеріңізге сала кетейік, бұған дейін Павлодар облысының сауда және тұтынушылардың құқықтарын қорғау департаменті бірқатар әлеуметтік маңызы бар азық-түлік тауарларының (ӘМАТ) бағасын негізсіз асыра көтеру фактілерін анықтады.
Ведомство қызметкерлері кейбір өнімдердің шамадан тыс үстеме бағамен сатылғанын анықтады. Мәселен, қырыққабатты килограмына 100 теңгеден сатып алып, 450 теңгеден сатқан — үстеме 350% құраған. Сондай-ақ, департамент қызметкерлері келесі тауарлар бойынша бағаның асыра көтерілу жағдайларын анықтады: сәбіз — 275%, картоп — 106%, пияз — 86%, қарақұмық жармасы — 52% және тауық еті — 27%.