Қостанай облысының қылмыстық істер жөніндегі мамандандырылған ауданаралық соты полиция капитанына қатысты қылмыстық істі қарады.
Жоғарғы соттың баспасөз қызметінің мәліметінше, ол қылмысқа арандату, ерекше ірі мөлшердегі есірткі құралдарын өткізу мақсатында заңсыз сақтау, тасымалдау және лауазымдық өкілеттіктерді асыра пайдалану бойынша айыпталуда.
«Қостанай қаласы ПБ-нің есірткі қылмысына қарсы күрес бөлімі бастығының орынбасары тергеумен анықталмаған полиция қызметкерлерімен бірге, дене жарақаттарын салу және қорқыту арқылы бір азаматты екіншісін ерекше ауыр қылмыс жасауға итермелеуге мәжбүрлеп, кейін оны әшкерелеу және қылмыстық жауапкершілікке тарту мақсатын көздеген», - делінген хабарламада.
Бастықтың орынбасары «қылмыстық әрекетті имитациялайтын» тұлғаға ерекше ірі мөлшердегі психотроптық затты және оның аналогын жүйелі түрде сатқаны хабарланады.
Полицейдің көлігін тінту барысында ол өткізу мақсатында заңсыз сақтаған және тасымалдаған гашиш пен меткатинон (психотроптық заттың аналогы) тәркіленді.
Сот полиция капитанын 15 жылға бас бостандығынан айыруға, мемлекеттік қызметте лауазымдарды атқару құқығынан өмір бойына айыруға және атағынан айыруға үкім шығарды.
Еске сала кетейік, бұрын хабарланғандай, Жамбыл облысының полиция қызметкері бір азаматқа синтетикалық есірткі сатып алуға ақша беріп, кейін ұстаған. Үкім шығарылғаннан кейін ведомствоға сотталғанның адвокаты жүгінген. Ол өз қорғауындағы адамға қатысты полиция қызметкерлері тарапынан арандату болғанын айтқан.