БҚО-да «Сапа PLUS» ЖШС қаржы пирамидасын ұйымдастырушыға үкім шығарылды.
БҚО прокуратурасы баспасөз қызметінің мәліметінше, заңды жобаларға инвестиция салудың астына жасырынып, жоғары табыс уәде етіп, айыпталушы 73 салымшының ақшасын заңсыз тартқан. Жәбірленушілердің материалдық шығыны 143 млн теңгеден асқан.
«Кейін өзіне бір адамдық басшылықтың барлық өкілеттігін беріп, «Свой ДОМ kz» тұтыну кооперативі мен «Pater House» тұрғын үй құрылыс кооперативінің ақша қаражатын жалпы сомасы 161 млн теңгеден астам ұрлады», - делінген хабарламада.
Нәтижесінде сот айыпталушыны кінәлі деп танып, оған 7 жыл бас бостандығынан айыру жазасын және қаржы ұйымдарында басшылық лауазымдарды атқару және қаржы ұйымының қатысушысы болу құқығынан 10 жылға айыру жазасын тағайындады.
Сонымен қатар, сотталғанның жер учаскесі мен автокөлігі тәркіленіп, жәбірленушілерге келтірілген залалды өтеуге бағытталды.
Еске сала кетейік, бұған дейін Қостанай облысында Qnet қаржы пирамидасының басшысы сотталып, 6 жылға бас бостандығынан айырылған еді. Оның құрбандары 94 адам болды. Залал 86 млн теңгені құрады.
Шілдеде Қаржылық мониторинг агенттігі (ҚМА) Ұлытау облысының тұрғындарына қатысты қаржы пирамидасы ісі бойынша сотқа дейінгі тергеуді аяқтады. Екі азамат 9 айдан астам уақыт бойы «MetaGo» қаржы пирамидасын» жарнамалап, оның Жезқазғандағы бөлімшесін басқарған.
Күдіктілер облыс тұрғындарының қаражатын тартқан. Олардың қызметінен келтірілген залал сомасы 68 млн теңгеден асты, сонымен қатар құқық қорғау органдары 37 млн теңгеден астам сомаға мүлікті тәркіледі.