Қаржы мониторингі агенттігі (ҚМА) Қарағанды облысында бассейн құрылысына бөлінген бюджет қаражатын жымқыру ісін тергеп жатыр.
Ведомство баспасөз қызметінің дерегінше, күдікті жеткізілмеген құрылыс материалдары үшін ақшаны өз кәсіпорнының шотына, сондай-ақ бассейн құрылысына қатысы жоқ басқа кәсіпорындарға аударған.
«Кешенді сот құрылыс-экономикалық сараптамасының, сот-экономикалық сараптамасының қорытындылары бойынша, мемлекетке орындалмаған жұмыстар мен жоқ материалдардан тұратын 130 млн теңгеден астам залал келтірілген», - делінген хабарламада.
Аталған азамат ұсталды, оған қатысты сот «үй қамағы» түріндегі бұлтартпау шарасын қолданды.
Еске салайық, бұрын хабарланғандай, Шығыс Қазақстан облысы Үлкен Нарын ауылында бассейні бар дене шынықтыру-сауықтыру кешенін (ДШСК) үшінші жыл бойы салуда.
Бастапқыда, 2021 жылғы желтоқсанда ауылдағы бассейн құрылысына 487 373 696 теңге бөлінді. Құрылысты «QazConstruction» компаниясы жүргізді.
Кейін жобаны орындау барысында облыстық шенеуніктер келісімшартқа 10 қосымша келісім жасап, соманы 666 392 132 теңгеге ұлғайтып, орындау мерзімін 2023 жылғы желтоқсанға дейін ұзартты. Алайда ДШСК ешқашан салынбады.