Жетісу облысының прокуратурасы «Хоргос» шекара маңы ынтымақтастығы халықаралық орталығы басқарушы компаниясының жұмысында инвесторларға қосылған құн салығын (ҚҚС) заңсыз есептеуге байланысты бұзушылықтарды анықтады. Бұзушылықтар жойылды, қаражаттың бір бөлігі қайтарылды.
ТЕКСЕРУ НЕНІ АНЫҚТАДЫ
Жетісу облысы прокуратурасының мәліметінше, тексеру инвесторлардың құқығын қорғау комитетінің үйлестіруімен жүргізілді. Екі жыл бойы 70 млрд теңгеден астам сомаға жобаларды жүзеге асыратын 19 инвесторға қатысты сумен жабдықтау тарифтерін есептеу кезінде ҚҚС заңсыз есептелгені анықталды.
Сонымен қатар, Салық кодексіне сәйкес, арнайы экономикалық аймақтар аумағындағы қызмет ҚҚС төлеуден босатылған. Осыған қарамастан, заңнама талаптары жүйелі түрде еленбеген.
Салықты есептеу нәтижесінде инвесторлар қосымша қаржылық шығындарға ұшыраған. Бизнес үшін жобаларды іске асыру жағдайларына әсер ететін әкімшілік кедергілер қалыптасқан.
ҚАНДАЙ ШАРАЛАР ҚАБЫЛДАНДЫ
Прокурорлық қадағалау актісі бойынша бұзушылықтар толығымен жойылды.
«Инвесторларға заңсыз өндіріп алынған 1 млн теңге көлеміндегі қаражат қайтарылды, кінәлі тұлғалар жауапкершілікке тартылды», — делінген хабарламада.
ПРОКУРАТУРАНЫҢ ҰСТАНЫМЫ
Облыс прокуратурасы инвесторларға қысым жасау және олардың құқықтарын бұзу әрекеттерінің кез келгеніне жол берілмейтінін мәлімдеді.
Ведомство сондай-ақ әкімшілік кедергілерге тап болған кәсіпкерлерді +7 (771) 131-04-44 немесе 115 Call-орталығына хабарласуға шақырды.